Хезмәттәшлек турында акт Дон Республика Хәрәкәтенең Европадагы вәкиллеге белән Бәйсез Татарстанның сөргендәге Хөкүмәте арасында

Яклар:

1 нче Як: Дон Республика Хәрәкәтенең Европадагы вәкиллеге (алга таба — ДРХ Европа), тарихи территориясе — Дон Республикасы — Россия Федерациясе тарафыннан оккупацияләнгән халыкларның мәнфәгатьләрен тәкъдим итә. Вәкиллек халыкара хокук принциплары нигезендә, шул исәптән БМО Уставының 1 нче маддәсенә ярашлы рәвештә халыкларның үзбилгеләнү хокукына таянып эш итә.

2 нче Як: Бәйсез Татарстанның сөргендәге Хөкүмәте (алга таба — Татарстан Хөкүмәте) — суверен территориясе Россия Федерациясе тарафыннан оккупацияләнгән бәйсез Татарстанның легитим вәкиллекле органы. Хөкүмәт татар милли яңарышы принциплары һәм җирле халыкларның хокукларын гарантияләүче халыкара хокук нормалары нигезендә эш итә.

Преамбула

ДРХ вәкиллеге һәм Татарстан Хөкүмәте, үзләренең тарихи территорияләренең агрессор — Россия Федерациясе — тарафыннан оккупацияләнү фаҗигасенең уртак булуын аңлап, милли суверенитетны торгызу, демократик кыйммәтләрне һәм үз халыкларының гуманитар хокукларын яклау өчен көрәштә тирән теләктәшлек белдерәләр.

Ике Як та оккупациянең халыкара хокукның төп принципларын бозуын таный һәм Мәскәүнең империалистик сәясәтенә коллектив рәвештә каршы тору зарурлыгын ассызыклый.

Яклар вәкилләренең очрашуы барышында хезмәттәшлекне уңышлы җайга салу Россиянең оккупацияләнгән халыкларының киң коалициясен булдыру юлындагы мөһим адым буларак билгеләнде.

Үзара хөрмәт, тигез хокуклылык һәм үзара файда принципларына таянып, Яклар мәдәни һәм башка элемтәләрне ныгыту, шулай ук үз халыкларының хокукларын халыкара мәйданда бергәләп яклау максатыннан әлеге Хезмәттәшлек турында актны төзеделәр.

1 нче маддә. Хезмәттәшлекнең максатлары

Хезмәттәшлек түбәндәге максатларга юнәлтелә:

• Оккупация шартларында Дон һәм татар халыкларының милли үзенчәлеген саклау һәм үстерү;

• Оккупантлар тарата торган пропагандага һәм дезинформациягә каршы тору;

• Построссия киңлеген деоккупацияләүне һәм федерализацияләүне яклау өчен халыкара мәйданнардагы позицияләрне ныгыту;

• Глобаль демократияләштерү һәм деколонизация процессына өлеш кертү.

2 нче маддә. Хезмәттәшлек өлкәләре

Яклар түбәндәге өлкәләрдә хезмәттәшлекне үстерергә килешәләр:

1. Мәдәни өлкә:

• Дон һәм татар халыкларының тарихына, әдәбиятына һәм сәнгатенә багышланган уртак мәдәни чаралар, конференцияләр, күргәзмәләр һәм фестивальләр оештыру;

• Телләрне, фольклорны һәм традицияләрне саклау һәм популярлаштыру; милли мирасның санлы архивын булдыру өлкәсендә тәҗрибә уртаклашу.

2. Икътисади өлкә:

• Диаспора вәкилләре арасында икътисади элемтәләрне үстерүгә ярдәм итү, шул исәптән Европадагы инвестиция мөмкинлекләре турында мәгълүмат алмашу;

• Оккупацияләнгән төбәкләрдән мәҗбүри күчеп китүчеләр арасында бизнесны һәм эшмәкәрлекне яклау буенча уртак инициативалар;

• Деоккупациядән соң территорияләрнең икътисади потенциалын торгызу өчен халыкара ярдәм җәлеп итү буенча тырышлыкларны координацияләү.

3. Сәяси һәм гуманитар өлкә:

• Оккупацияләнгән халыкларның хокуклары турында резолюцияләрне алга сөрү максатыннан халыкара оешмаларда (БМО, АБ, ЕКХО) уртак эш алып бару;

• Качакларга һәм оккупация корбаннарына ярдәмне дә кертеп, гуманитар ярдәм оештыру;

• Кеше хокукларын яклау эшчәнлеге, кеше хокукларын бозу очракларын мониторинглау һәм юридик яклау өлкәләрендә мәгълүмат һәм эксперт тәҗрибәсе белән алмашу.

4. Мәгълүмати һәм фәнни-тикшеренү өлкәсе:

• Оккупацияләнгән төбәкләрдәге вазгыять турында объектив мәгълүмат тарату өчен уртак платформалар булдыру;

• Деколонизация контекстында сәяси фәлсәфә, тарих фәлсәфәсе һәм халыкара хокук буенча уртак тикшеренүләр үткәрү;

• Европада һәм дөньяда Россия йогынтысына каршы тору стратегияләрен эшләү.

3 нче маддә. Йомгаклау нигезләмәләре

• Әлеге Акт рус телендә бер үк юридик көчкә ия булган ике төп нөсхәдә төзелде.

• Бәхәсләр сөйләшүләр юлы белән хәл ителә.

• Актны гамәлгә ашыру турында мәгълүмат Якларның рәсми ресурсларында бастырыла.

Якларның имзалары:

Дон Республика Хәрәкәтенең
Европадагы вәкиллеге исеменнән:

Евгений Илларионов

Бәйсез Татарстанның сөргендәге
Хөкүмәте исеменнән:

Марат Әхмәров